Акафист прмц. Марии Гатчинской

Кондак 1

Избранная угоднице и страдалице Христова, преподобномученице мати Марие, в земли Гатчинстей верным возсияла еси подвигом твоим смиренным. И ныне похвальная восписуем ти, любовию творящии память твою, да твоего заступления пред Господем сподобльшеся, не престанем пети тебе во умилении сердечнем:
Радуйся, преподобномученице Марие, смиренная страдалице и теплая о нас молитвеннице.

Икос 1

Ангели Божии удивишася, егда еще во плоти сущи, неустанною молитвою и дарованьми духовными небесному воинству подражати сподобилася еси, славословящи Господа Сил. И в Церкви земней, воинствующей за правду Христову во времена безбожия, веру непоколебимую соблюла еси. Да и мы на твой образ взирающе, воспоем тебе таковая:
Радуйся, христианскаго благочестия богоносная отрасле.
Радуйся, кротость ангельскую явившая.
Радуйся, скорбь земную на радость пременившая.
Радуйся, утешение небесное улучившая.
Радуйся, сердце свое горе устремившая.
Радуйся, всю жизнь Христу Богу посвятившая.
Радуйся, любве Божия посланнице.
Радуйся, веры православныя неугасимый пламене.
Радуйся, преподобномученице Марие, смиренная страдалице и теплая о нас молитвеннице.

Кондак 2

Витии многовещаннии не возмогут воспети подвиги твоя достойно, преподобная мати, занеже недугом лютым поражена бысть во дни юности твоея и неустанно Христу последующи, в келлии своей пребыла еси во вся дни жития своего, воспевающи Господу Сил: Аллилуиа.

Икос 2

Плоть твоя посечена бысть болезнию тяжкою попущением Божиим, да не плод мирских дел скорогиблющий принесеши в житии твоем, но нетленный плод духовныя благодати. Велие дерзновение ко Христу приобрела еси, да и мы велегласно воспоем тебе таковая:
Радуйся, воли Божией с кротостию и смирением последовавшая.
Радуйся, мученичества твоего благодать приимшая.
Радуйся, на Христа распятаго во вся дни жития твоего взиравшая.
Радуйся, крест твой вослед Ему подъемшая.
Радуйся, тишиною молитв Богу предстоящая,
Радуйся, за весь мир Господа умоляющая.
Радуйся, помощнице в скорбех унывающим.
Радуйся, отверзающая очи духовно слепым.
Радуйся, преподобномученице Марие, смиренная страдалице и теплая о нас молитвеннице.

Кондак 3

Всемилостивый Господь, укрепляя дух твой скорбию и тяготою
безвременною, исторгнув тя из юдоли земныя суеты, Иову многострадальному тебе уподобив, дарова тебе чистоту сердечную. Ты же, праведная Марие, имущи, любовь Божию, из глубины души воcпевала еси Ему: Аллилуиа.

Икос 3

Яко злато в горниле бурею помыслов, на дух воюющих, искушена бысть мати Марие. Кротостью и слезами вопияла еси ко Христу Богу и тишину Его духовным подвигом стяжавши, яко миром благоуханным, напоена бысть. Мы же, благодать Божию восприявше, воспеваем тебе сицевая:
Радуйся, лесть вражию терпением поправшая.
Радуйся, душу твою скорбьми очистившая.
Радуйся, страдалице, милосердием к человеком преисполненная.
Радуйся, страстотерпице, ближняго своего, яко сама себе, возлюбившая.
Радуйся, молитвеннице, дар утешения страждущих стяжавшая.
Радуйся, яко дивная голубица, душею чистою к небесем воспарившая.
Радуйся, венец славы нетленныя от Бога приявшая.
Радуйся, скорби временныя в радость вечную претворившая.
Радуйся, преподобномученице Марие, смиренная страдалице и теплая о нас молитвеннице.

Кондак 4

Яко бисер безценный обретоша тя в молитвенном уединении благочестивии людие, не немощь узревше в тебе, а ум, горняя мудрствующий, и за словом утешения притекающе к тебе, утешени быша духовно сторицею, воспевающе великому и всещедрому Богу: Аллилуиа.

Икос 4

Верою и любовию приступала еси к Чаше жизни, неосужденно приемлющи Тело и Кровь Христову, да укрепит предызбравый тя Христос, и да живет в тебе и действует. Тако просвещена Духом Божиим, вся дни живота во Христе пожила еси, да и мы воспоим тебе таковая:
Радуйся, восприимшая светозарную благодать от божественнаго свыше промышления.
Радуйся, светом трисолнечным душу свою просветившая.
Радуйся, ангелов радостное удивление и человеков благоговейное почитание.
Радуйся, демонов горькое рыдание и ожесточение.
Радуйся, язв телесных и скорбей душевных наших целительнице.
Радуйся, всегда о нас пред Богом ходатаице.
Радуйся, немощи наша молитвами твоими врачующая.
Радуйся, образом жития твоего жизнь нашу ко спасению направляющая.
Радуйся, преподобномученице Марие, смиренная страдалице и теплая за нас молитвеннице.

Кондак 5

Мудрым девам уподобившися, сохранила еси елей молитв и милосердия в сретение Господа, да не с угасшим светильником срящеши явление Его, воспевающи Всемилостивому Богу, тако промышляющему о верных рабех Своих: Аллилуиа.

Икос 5

Зрящи землю Российскую в духовный мрак повергаемую, духом сокрушалася еси и чистые души дев юных благовестием Христовым согревала еси, привлекающи их к служению Богу и ближнему в годину безбожия. Темже и мы, подражающе тебе, чистою любовию к Богу и ближнему востецем, поюще тебе таковая:
Радуйся, чтущия тя от всяких напастей избавляющая.
Радуйся, терпением твоим нас назидающая.
Радуйся, свещею души твоея нас просвещающая.
Радуйся, недугующим руку помощи подающая.
Радуйся, безбожных и лукавых вразумление,
Радуйся, образе тайнаго крестоношения.
Радуйся, чистоты небесныя сияние,
Радуйся, веры, надежды и любве сочетание.
Радуйся, преподобномученице Марие, смиренная страдалице и теплая о нас молитвеннице.

Кондак 6

Священномученик митрополит Вениамин посети келлию твою и с тобою беседовав, благословение тебе на иноческий подвиг подаде, да укрепит тя подвигоположник Господь, во еже пети Ему: Аллилуиа.

Икос 6

Зрим монашеское пострижение твое во дни гонений в храме Покрова Богородицы его же с благоговением восприяла еси. Темже исполнившая заповеди Христовы и иноческия обеты, подвигаеши нас ублажати тя и воспевати тебе таковая:
Радуйся, сопричастнице новомучеником церкве Российския.
Радуйся, духом исповедничества ведомая.
Радуйся, своим крестоношением в Царство Небесное притекшая.
Радуйся, язвы Господа твоего на телеси своем понесшая.
Радуйся, яко тобою постигаем правду Божию,
Радуйся, яко тобою последуем Христу.
Радуйся, гонимых за веру в подвизе укреплявшая,
Радуйся, молитвами твоими путь их мученичества осветившая.
Радуйся, преподобномученице Марие, смиренная страдалице и теплая о нас молитвеннице.

Кондак 7

Прикровен бысть подвиг твой, но по слову Господню, «не может град укрытися верху горы стоя. Ниже вжигают светильника, и поставляют его под спудом, но на свещнице и светит всем, иже в храмине суть». Тако и свет добродетелей твоих, преподобная мати Марие, возсия людем страждущим, да воззревше на него, обретут упование неложное на Всесильного во святых Cвоих Бога, воспевающе Ему: Аллилуиа.

Икос 7

Келлия твоя, иконами преукрашенная и благодатию молитв твоих облагоуханная, небо земное для страждущих людей бысть, иже во множестве притекаху к тебе, духовнаго совета, молитв и утешения взыскующе. Они же, радостию духовною упоении, силою Господнею укрепляемии на предлежащий им подвиг, воспеваху тебе таковая:
Радуйся, немощь естества человеческаго победившая.
Радуйся, тесным путем ко спасению пришедшая.
Радуйся, мужества духовнаго сокровище.
Радуйся, унывающих в скорбех прибежище.
Радуйся, немудрыя смирением умудрившая.
Радуйся, малодушныя духом укрепившая.
Радуйся, явившая нам крепость упования,
Радуйся, даровавшая нам свет небеснаго радования.
Радуйся, преподобномученице Марие, смиренная страдалице и теплая о нас молитвеннице.

Кондак 8

Веру отеческую безбоязненно исповедующи, богомудрый глагол священномученика Вениамина в сердце своем восприяла еси, яко не людие спасают Церковь, но Кровию Своею Христос Бог наш. Да и мы, дерзновение твое мученическое зряще, страстотерпице Христова, малодушие и лукавство от сердец наших отринем, воспевающе Богу: Аллилуиа.

Икос 8

В немощи лежащи, совершала еси молитвы к милосердному Богу, да простит грехи людския, да приведет всех к истинней вере, да обратит неверныя, да восставит падшия. И благоугодна бысть Богу слезная молитва твоя, мати Марие. Темже и мы, дерзновению твоей святости дивящеся, воспоем тебе сицевая:
Радуйся, утешением горечь скорбей услаждающая.
Радуйся, уповати на волю Божию нас призывающая.
Радуйся, яко не сокрыто бысть от тебе многое потаенное.
Радуйся, яко молитвы твоя достигоша небес.
Радуйся, козни диавольския поправшая.
Радуйся, руце твои к щедрому Богу простиравшая.
Радуйся, враги вразумляющая.
Радуйся, теплотою молитв твоих хладная сердца к Богу обращающая.
Радуйся, преподобномученице Марие, смиренная страдалице и теплая о нас молитвеннице.

Кондак 9

Единому втайне моления приносила еси Владыце Христу, дар утешения скорбящих стяжала еси, имже посещаеши немощныя люди. Темже и мы по молитвам твоим, святая угоднице, милости Божия сподобившеся, поем во умилении сердец: Аллилуиа.

Икос 9

Далече от града Гатчины изыде слава добродетелей твоих, и множество людей из иных градов и весей, тебе, еще в многоболезненнем твоем телеси сущей, воздаяху хвалу Богу, святость твою именующе, да и мы с ними прославляем Божию милость и вопием ти:
Радуйся, твоими молитвами нас к Богу приводящая.
Радуйся, к Cвету Невечернему души обращающая.
Радуйся, благословенная невесто Христова.
Радуйся, избраннице Небеснаго Отца.
Радуйся, безумие мира житием своим обличающая.
Радуйся, образом благочестия нас обогащающая.
Радуйся, силу веры нам явившая.
Радуйся нищетою духовною дары Духа Святаго стяжавшая.
Радуйся, преподобномученице Марие, смиренная страдалице и теплая о нас молитвеннице.

Кондак 10

Всякое естество удивися сиянию в тебе благодати и богатству добродетелей: ангелоподобней чистоте твоей, мужеству в скорбех и страданиих, в немощнем женстем телеси явленному, и многому состраданию к людем. Сего ради, преподобная мати, поем прославившему тя Господу: Аллилуиа.

Икос 10

Не возможе враг спасения диавол помрачити подвиги твоя, имиже возсияла еси на радость и утешение всем. И в ангельстем чине служение свое совершающи, учила еси православныя люди быти верными Христу до смерти, и любовь Его в сердцах своих возгревати непрестанно, да не устрашат страдальцев узы, темницы, мучения и смерть. Темже глаголем тебе таковая:
Радуйся, исповедания безстрашнаго образе.
Радуйся, щедрот Божиих вместилище.
Радуйся, пасхальною радостию исполненная.
Радуйся, к небесному радованию страданьми востекшая.
Радуйся, от нечестия безбожнаго души отвращающая.
Радуйся, терпение в скорбех явившая.
Радуйся, Божественных даров приятелище.
Радуйся, милостей Господних сокровище.
Радуйся, преподобномученице Марие, смиренная страдалице и теплая о нас молитвеннице.

Кондак 11

В нощи приидоша в жилище твое мучитилие, и многоболезненное тело твое на колесницу ввергоша, болезнь и поругание тебе творяще. Ты же, преподобномученице Марие, устремивши ум твой ко Господу, воспевала еси Ему: Аллилуиа.

Икос 11

Сквозе огнь мучений и море слез возшла еси изволением Божиим в покой вечный. Мучителие же твои недоумеваху: како толикое множество людей свидетельствова славу святости твоея. Темже и мы, прославляюще подвиги твоя, святая мученице, глаголем ти сице:
Радуйся, луче солнечная Царства Небеснаго.
Радуйся, назнаменованная даром избрания.
Радуйся, мрака душевнаго отгнание,
Радуйся, молитвы богоугодныя стяжание.
Радуйся, истинный путь верным указавшая.
Радуйся, венец от Господа Сил приявшая.
Радуйся, освятившая молитвою град Гатчину,
Радуйся, святынею мощей твоих осиявшая ю.
Радуйся, преподобномученице Марие, смиренная страдалице и теплая о нас молитвеннице.

Кондак 12

Не приложися плоти и крови, но уразумевши волю Господню, принеслася еси яко жертва непорочная на заколение. В темнице, в последние дни земнаго странствования твоего слова апостола произносила еси: «Кто ны разлучит от любве Божия, скорбь ли, или теснота, или гонение, или глад, или нагота, или беда, или меч». Темже вся простивши мучителем твоим, блаженная Марие, воспевала еси Богу: Аллилуиа.

Икос 12

Ангел от Господа послан бысть к тебе в темницу, да восхитит душу твою святую и в веселие любящих Бога введет, да и мы, освящаеми кровьми мучений твоих, воспоем тебе таковая:
Радуйся, ангельским ликом сочетавшаяся.
Радуйся, добродетелей плоды Богу принесшая.
Радуйся, очищение сердцам нашим у Христа просящая.
Радуйся, от скверны греховныя тыя врачующая.
Радуйся, от мучительства бесовскаго избавляющая.
Радуйся, припадающих к тебе с молитвою милующая.
Радуйся, лик праведников Санкт-Петербургских украшающая.
Радуйся, в сонме новомучеников Российских просиявшая.
Радуйся, преподобномученице Марие, смиренная страдалице и теплая о нас молитвеннице.

Кондак 13

О святая преподобномученице Марие, зрим юность твою, в борениих духовных и смирении протекшую, зрим зрелость твою в богомыслии и молитве закаленную, зрим и кончину твою мученическую. Зрим ныне и славу твою небесную! Буди теплая ходатаице и заступнице о нас пред Господем, да присно поем Ему: Аллилуиа.
(Сей кондак читается трижды)

Икос 1

Ангели Божии удивишася, егда еще во плоти сущи, неустанною молитвою и дарованьми духовными небесному воинству подражати сподобилася еси, славословящи Господа Сил. И в Церкви земней, воинствующей за правду Христову во времена безбожия, веру непоколебимую соблюла еси. Да и мы на твой образ взирающе, воспоем тебе таковая:
Радуйся, христианскаго благочестия богоносная отрасле.
Радуйся, кротость ангельскую явившая.
Радуйся, скорбь земную на радость пременившая.
Радуйся, утешение небесное улучившая.
Радуйся, сердце свое горе устремившая.
Радуйся, всю жизнь Христу Богу посвятившая.
Радуйся, любве Божия посланнице.
Радуйся, веры православныя неугасимый пламене.
Радуйся, преподобномученице Марие, смиренная страдалице и теплая о нас молитвеннице.

Кондак 1

Избранная угоднице и страдалице Христова, преподобномученице мати Марие, в земли Гатчинстей верным возсияла еси подвигом твоим смиренным. И ныне похвальная восписуем ти, любовию творящии память твою, да твоего заступления пред Господем сподобльшеся, не престанем пети тебе во умилении сердечнем:
Радуйся, преподобномученице Марие, смиренная страдалице и теплая о нас молитвеннице.

Молитва

О преподобномученице святая, мати Марие, ангелов похвало, новомучеников и исповедников славо! Призри на нас грешных, предстоящих и молящихся тебе, яко теплой заступнице и смиренной ходатаице пред Господем, Ему же молитвою и постом, верою и терпением скорбей угодила еси. Тебе бо, яко светильник веры Христовы даром прозорливости и чудотворений ущедри Господь. Виждь слезы наша и покаяние, умоли милостиваго Бога даровати нам (имена) грехов прощение, к ближнему любовь нелицемерную, в вере крепость неизменную, в житии целомудрие и благочестие.
О, преблагая мати, осени твоим благоволением всех, чтущих святую память твою. Испроси молитвами твоими у Всемилостиваго Бога нам в скорбех – утешение, в бедах – избавление, в болезнех – исцеление.
Умоли, преподобномученице святая, милостиваго Создателя нашего, да не одолеет злоба неизреченныя благости Его, и да сподобимся дни жизни сея привременныя во всяком благочестии и чистоте пожити, славяще Отца и Сына и Святаго Духа ныне и присно и во веки веков. Аминь.

Тропарь, глас 4-й

Агнице Твоя, Иисусе, Мария, / утешение рабом Твоим в годину лютую явися, / крепость веры и благочестия показавши, / мучения претерпе от богоборцев. / Тоя молитвами яко милостив спаси души наша.

Кондак, глас 4-й

Страдалице и благовестнице пречудная, / молитвеннице за всех скорбящих и страждущих, / преподобномученице мати Марие, / молися Господу Богу со всеми новомученики Российскими / спасение нам даровати и помиловати души наша.

Величание

Величаем тя, / страстотерпице преподобная мати Марие, / и чтим честная страдания твоя, / яже за Христа во утверждение на Руси Православия // претерпела еси.

Составитель — Виктор Васильев

Текст по изданию Гатчинского Павловского кафедрального собора

5 Comments

  1. Спасибо большое. Очень хорошо составлен акафист, но, к сожалению, как и практически все сейчас издающиеся акафисты, с грубыми грамматическими ошибками в славянском языке и просто русскими формами вместо славянских. Напр., «изыдоша (мн.ч.) слава твоя», и проч. Получается, что поддерживается некое подобие славянского языка — все равно никто не заметит. Как апологет этого языка и сторонник его всяческого изучения и сохранения в богослужебных текстах, я взяла бы на себя труд грамотно исправить текст хотя бы на сайте, ну если конечно сочтете это уместным и нужным — ведь текст, наверно, уже одобрен и благословлен священноначалием. Желаю вам во всем помощи Божией. Наталия Олисова. Переводчик с древнегреческого языка (есть публикации), преподаватель славянского языка в воскр. школе Троице-Сергиевой Пустыни, сестра милосердия, звонарь храма прп. Андрея Критского в Сергиево.

    Наталия
  2. Спаси Господи, нашла у вас на сайте акафист, буду читать.

    Светлана (с 17.04.2019 инокиня Мария) Мария Гатчинская теперь моя покровительница
  3. Преподобномученице Мати Мария, моли Бога о нас и о наших сродниках!!! Моли Бога о России и о мире! Моли Бога о духовном здравии и покаянии русского народа! Будь нам помощница в молитвенных трудах и в делах милосердия, научи терпению, смирению, кротости и воздержанию. Слава Богу за всё!

    Юля

Добавить комментарий

Ваш адрес email не будет опубликован. Обязательные поля помечены *